Feb23

એમાં ખોટું શું છે?

ઘર છે તો મતભેદ થોડા થાય એમાં ખોટું શું છે? 
આપણાં છે એજ તો ખિજવાય એમાં ખોટું શું છે?

ઈશ્વરે આપ્યો છે ઈશ્વરનો દરજ્જો એને એથી, 
મા ને પણ તું કારે બોલાવાય એમાં ખોટું શું છે?

પુત્રનાં સંસ્કાર બાબત છોડ રડવાનું હવે તો, 
તે જ આપેલા તને દેખાય એમાં ખોટું શું છે? .

હોય મસ્તક એનું ઉન્નત જે ખુમારીથી જીવે છે 
ચાલવાં માટે નીચું જોવાય એમાં ખોટું શું છે? .

માવતર ઘડપણમાં બાળક જેમ બનતાં જાય ત્યારે, 
વાત તારી એને ના સમજાય એમાં ખોટું શું છે?

શૂન્ય માંથી  તે અહમ્ ને એવડો મોટો કર્યો છે  
એ તને આખો ડુબાડી જાય એમાં ખોટું શું છે? .

રોજ ખામી વેદ ને વેદાંતની કાઢ્યા કરે પણ,
ખુદની અંદર કોઈ જો ડોકાય એમાં ખોટું શું છે? .

વિપુલ માંગરોલીયા ( વેદાંત )

-

Posted in વેદાંતની ગઝલો ૨૦૧૫-૧૬
.