Feb23

જીંદગી, જડતી નથી

એ મન મુકી રડતી નથી ને મન ભરી હસતી નથી, 
જે સ્કૂલનાં દફતરથી નિકળી જીંદગી, જડતી નથી.

સૂરજમુખી સમ આંખને લાગી નજર કોની ભલા,
અડધી વિતી ગઈ રાત તો પણ કેમ એ ઢળતી નથી.

ખોબો ભરીને સ્કુલની માટી  મેં કુંડામાં ભરી,
બચપણની એમાંથી છતાં સોડમ હવે ઉગતી નથી.

બાળકની માફક હું રડી શક્તો નથી બસ એટલે, 
દિકરીને ભીની આંખ મારી સ્હેજ પણ ગમતી નથી.

કાદવ ભરેલા પગ લઈ ઘર જાવ જાણીજોઈને 
પણ લાકડાંની ફ્રેમમાંથી બા હવે વઢતી નથી.

ઈચ્છાઓનાં દરીયામાં આશાની ઉતારી નાવ , પણ
આગળ નથી વધતી અને પાછી હવે ફરતી નથી.

સીધી સરળ રાજા ને રાણીની કહી દે વારતા 
આ વેદ કે વેદાંત ની વાતો સમજ પડતી નથી.

વિપુલ માંગરોલીયા ( વેદાંત )

-

Posted in વેદાંતની ગઝલો ૨૦૧૫-૧૬
.