Feb23

તોય ગિરધારી તને ગોકુળ ના ફાવ્યું !

તારાં એક એક પગલે અહીં હૈયું પથરાવ્યું , 
તોય ગિરધારી તને ગોકુળ ના ફાવ્યું !

જાણી જોઈ ખુલ્લા મુકી બારણાં ને બારી,
આંખ આડા કાન કરે ગોપીયુ બિચારી, 
પાછી હરખે સૌને કહે  માખણ ચોરાયું
         તોય ગિરધારી તને ગોકુળ ના ફાવ્યું !

એક તારાં હોઠોનાં આલિંગન કાજે, 
લાજ મુકી વાંસડાએ જંગલની આજે, 
નિર્વસ્ત્ર થઈને એણે તનને વિંધાવ્યું,
           તોય ગિરધારી તને ગોકુળ ના ફાવ્યું !

બદલ્યા છે વહેણ આજ નીરે જમુનાનાં, 
કાંઠા બન્યા છે જાણે નેણ જશોદાનાં, 
ગામ આખેઆખું એનાં પૂરમાં તણાયું,
            તોય ગિરધારી તને ગોકુળ ના ફાવ્યું !

મોરલીની ફુંક જાણે સાદ તારો થઈ ગઈ ,
જગની સાથે રાધા ખુદને વિસરી ગઈ,
નામ બીજા કોઈનું નાં એનાં મોઢે આવ્યું, 
            તોય ગિરધારી તને ગોકુળ ના ફાવ્યું !

વિપુલ માંગરોલીયા ( વેદાંત ) 

-

Posted in ગીત
.