Feb23

નાદમાં ને શૂન્યતામાં તું નથી તો કોણ છે?

નાદમાં ને શૂન્યતામાં તું નથી તો કોણ છે? 
ના કશામાં પણ બધામાં તું નથી તો કોણ છે?

કોઈ બાળકનાં પ્રસવ ટાણે જે આંખોમાં ઉગે,
અશ્રુની એ ભવ્યતામાં તું નથી તો કોણ છે? 

શબ્દનાં વસ્ત્રો સજાવી જ્યાં પરીઓ જન્મતી,
બાળપણની વારતામાં તું નથી તો કોણ છે?

એકલાં હાથે ઝઝૂમે છે જગત સાથે સદા, 
બાપનાં એ બાવડામાં તું નથી તો કોણ છે?

પાનખરનું દર્દ સઘળું સાચવી બેસી રહે, 
બાગનાં એ બાંકડામાં તું નથી તો કોણ છે?  

વિપુલ માંગરોળીયા ( વેદાંત ) 6/12/15

-

Posted in વેદાંતની ગઝલો ૨૦૧૫-૧૬
.