May22

જેવું લાગે છે

તમારી યાદથી પાંપણને ભારણ જેવું લાગે છે. 
હવેતો આંખનાં રણમાંય શ્રાવણ જેવું લાગે છે.

હવેતો દિલ નથી મારું ય મારા પણ કહેવામાં  
મને તો એ તમારી એક થાપણ જેવું લાગે છે.

હતું બસ એક ખાલીપો ભરેલું ચોકઠું આતો,
તમે આવ્યા હવે ફળિયા ને આંગણ જેવું લાગે છે.

અચાનક હાથ આપ્યો હાથમાં ઢાળી નજર નીચે
હકીકત છે કે સપનું એ વિમાસણ જેવું લાગે છે.

ગઝલ રૂપે લખાઈ જાય છે વેદાંત ની વાતો,
તમારો સાથ છે બસ એજ કારણ જેવું લાગે છે.

વિપુલ માંગરોલીયા ( વેદાંત ) 24.02.2015

-

Posted in વેદાંતની ગઝલો ૨૦૧૪-૧૫
.