અર્જુનની આજીજી માનો, ચાલો કેશવ પાછા ચાલો,
અશ્વોને થોડા સમજાવો, ચાલો કેશવ પાછા ચાલો.

શ્વાન ફરે છે વાહનમાં, ને સ્થાન નથી ઘરડાને ઘરમાં, 
લાગે છે કે કળિયુગ આવ્યો, ચાલો કેશવ પાછા ચાલો

કૌરવનાં કુળને લાગીતી એકજ અંધાપાની કાળપ,
ચારેકોર અહીં અંધાપો, ચાલો કેશવ પાછા ચાલો.

ત્યારે એકજ મામાથી  ભરમાયા સો ભાણા, ને આજે , 
એક દુર્યોધન સો ગાંધારો, ચાલો કેશવ પાછા ચાલો.

ગીતાનાં ઉપદેશો આજે બે પાનાંની વચ્ચે દાબી,
ખોટાંને પણ કરશે સાચો, ચાલો કેશવ પાછા ચાલો.

તારા નામે યુદ્ધો લડશે, મૂરત તારી ઢાલ બનાવી , 
કેમ પછી હથિયાર ઉપાડો, ચાલો કેશવ પાછા ચાલો.

બે પાસાનાં સંગ્રામે આ ધરતી લાલ કરી'તી તો પણ,
ઘર ઘર માંડી છે ચોપાટો, ચાલો કેશવ પાછા ચાલો.

વિપુલ માંગરોલીયા ( વેદાંત ) 01-01-2015

-