May22

પતંગનું ગીત

ગામ જોને  કેવું હિલોળે ચઢ્યું છે 
આભ આખેઆખું  પતંગે રંગ્યુ છે.

ઢગલો થયો છે આજ પગલાં નો ધાબા પર,
         
આંખે છે ચશ્માં ને ટોપી છે માથા પર 
          ધાબું પણ આજ જાણે ચોપાટી બન્યું છે. 
                         ગામ જોને  કેવું હિલોળે ચઢ્યું છે
          વાદળ ને કૈ દો આજ આડા ન આવે
         
પુછવી છે વાત આજ સૂરજને મારે
         
ચાંદા ની હારે તને  વાંકુ પડ્યું છે? .
                        
ગામ જોને કેવું હિલોળે ચઢ્યું છે
         ઘેલા થયા છે આજ ઝાડી ને ઝાંખરા 
         કેફ માં ઝૂમે છે ઓલ્યા દોરડા ને થાંભલા  
        
ફાટલી પતંગે એણે ઘરને મઢ્યુ છે. 
                         ગામ જોને કેવું હિલોળે ચઢ્યું છે
         પંખી ને કેજો આજ નોકરીએ જાય નૈ
         દાણા ની લાલચમાં પાંખ્યુ કપાય નૈ,
        
દોરીને આજે  તો ખુન્નસ ચઢ્યું છે .  
                        
ગામ જોને  કેવું હિલોળે ચઢ્યું છે
         અણીયાળી નજરુંથી છોકરીયું  વાર કરે
        
આખું આકાશ છોડી ધાબા પર પેચ લડે
        
છોકરાનું મન હવેતો ચકડોળે ચડયું છે. 
                         ગામ જોને કેવું હિલોળે ચઢ્યું છે
                         આભ આખેઆખું પતંગે રંગ્યુ છે.

વિપુલ માંગરોલીયા ( વેદાંત) 16-12-2014

-

Posted in ગીત
.