Feb23

સ્હેજ માંથી ઘણું કરી બેઠો

સ્હેજ માંથી ઘણું કરી બેઠો,
પણ પછી ખુદને અવગણી બેઠો.

ઝાડની જોઈને આ એકલતા 
પાનખરમાં હું પાંગરી બેઠો.

વાત નિકળી ગઝલની ત્યારે હું, 
એક જણની સભા ભરી બેઠો *

એક સૂરજ દિવસથી કંટાળી, 
આભનાં છેડે ઓગળી બેઠો.

ઘરનો ચૂલો  સળગતો જેનાંથી 
એજ તણખો હું ઓલવી બેઠો.

વ્હેંત અધ્ધર થયો પછી એ રથ,
થૈ ને જ્યારે એ સારથી બેઠો?

હાંડલે માંડી કુસ્તી , પણ નરશી,
ગામ આખાને નોતરી બેઠો.

વિપુલ માંગરોલીયા ( વેદાંત ) 

-

Posted in વેદાંતની ગઝલો ૨૦૧૫-૧૬
.